Menu

Articles

Dhimitër Anagnosti - Biografi

Dhimitër Anagnosti

Dhimitër Anagnosti regjisori shqiptar më i rëndësishëm i shekullit të kaluar, ka lindur në Vuno të rrethit të Vlorës më 23 janar 1936. Mbaroi shkollën e mesme "Ali Demi" në Vlorë, ku u dallua për prirjet e tij për letërsi. Studimet e larta i kreu me nota të shkëlqyera në Institutin Kinematografik "VGIK" të Moskës, ku u diplomua për kinooperator. Së bashku me Viktor Gjikën xhiruan si punë diplome filmin "Njeriu kurrë nuk vdes", një ekranizim i tregimit të Ernest Heminguejt, i cili u vlerësua me Çmimin e Parë në Festivalin Botëror të Shkollave Kinematgorafike, që u zhvillua në Holandë më 1961.

Filloi punë si operator në Kinostudion "Shqipëria e re" në 1961, me filmin "Debatik" (1961) e më pas me filmin "Toka jonë" (1964). Xhiroi edhe të parin film dokumentar me ngjyra "Gurët dekorativë". Filmin e parë si regjisor e realizoi në vitin 1966, së bashku me Viktor Gjikën , "Komisari i dritës" dhe një vit më vonë i vetëm si regjisor filmin "Dueli i heshtur". Në karrierën e tij 40-vjeçare ka realizuar 14 filma artistikë, 10 filma dokumentarë, ka fituar mjaft çmime në konkurime të ndryshme kombëtare e ndërkombëtare. Është autor i 15 skenarëve dhe pothuajse në të gjithë filmat e tij skenarin e ka shkruar vetë. Anagnosti është njeriu i mendimit të lirë, këmbëngulës në mbrojtjen e pikëpamjeve të tij, me një kurajo qytetare, e cila e ka vënë shpesh në shënjestër të mediokërve.

Për cilësitë e tij të rralla artistike, si dhe për veprat e tij dinjitoze është nderuar me titullin “Artist i Popullit”, 1987 dhe me kupën e karrierës në Festivalin e 10të Filmit Shqiptar. Viti 1991 e gjen të impenjuar në lëvizjen demokratike për pluralizmin në Shqipëri, motiv për të cilin zgjidhet edhe deputet i PD-së në Kuvendin e Shqipërisë (1991-1996). Në 12 pril 1992 u emërua ministër i Kulturës, Rinisë dhe Sporteve, post të cilin e mbajti deri në 4 dhjetor 1994, ku dha dorëheqjen. Anagnosti është ideator dhe kryetar i Fondacionit për Artin dhe Kulturën "Fan Noli", duke mbështetur intelektualët më aktivë, duke u impenjuar në forcimin e kulturës shqiptare në vend e në botë. Në vitin 2001 shkroi dhe vuri në skenë në TK dramën e vetme "Nata e trokitjeve në xham". Ndërsa në vitin 2005 korri sukses me filmin e tij më të fundit "Gjoleka, djali i Abazit", film i nderuar me dy çmime ndërkombëtare në Itali. Regjisori është i martuar me aktoren e mirënjohur të skenës dhe ekranit shqiptar, “Artisten e Merituar” Roza Anagnosti.

Veprat artistike

Ai është autor i shumë filmave shqip:

  • Gjoleka djali i Abazit (2006)
  • Kthimi i ushtrisë së vdekur (1989)
  • Përrallë nga e kaluara (1987)
  • Gurët e shtëpisë sime (1985)
  • Kujtime nga Gjirokastra (1983)
  • Vëllezër dhe shokë (1982)
  • Në shtepinë tonë (1979)
  • Monumenti (1977)
  • Lulëkuqet mbi mure (1976)
  • Kur hiqen maskat (1975)
  • Cuca e maleve (1974)
  • Përjetërsi (1974)
  • Motive nga dita e diel (1973)
  • Malet me blerim mbuluar (1971)
  • Parafabrikatet (1970)
  • Plagë të vjetra (1968)
  • Duel i heshtur (1967)
  • Komisari i dritës (1966)
  • Njeriu kurrë nuk vdes (1961)

 

 

Luftar Paja - Biografi

Luftar Paja

Luftar Paja lindi në Gorishovë të mallakastrës më 1 dhjetor 1941. Pas mbarimit të shkollës së mesme elektrike e pedagogjike në vitin 1963 mbaron studion 1 vjeçare për aktor në teatrin popullor. Qysh në moshë të re spikat talenti i tij si aktor. Kontribut të madhë në formimin e tij si aktor ka dhënë rregjisori Llazar Verria dhe veçanërisht aktori dhe regjisori i talentuar Pëllumb Kulla. Luftëtari është nderuar me medalje të çmimit të parë në vitin 1969 për kontributin e dhënë në grupet amatore, është nderuar me medaljen e Naim Frashëri e klasit të parë.

Në vitin 1968 u emërua aktor profesionist në estradën e Fierit. Në vitin 1971 është ndër të parët në krijimin e Teatrit Bylis Fier. Luan në teatër në dramën "Hijet e natës", "Fejesa e Çehovit". Nder rolet më të spikatura të aktorit Luftar paja janë: "Çobo Rrapushi me shokë" në rolin e Çobos. Në dramën "Vite të paharruara". "Fytyra e dytë". E në qindra e qindra komedi me nje akt. Në vitin 1979 merr titullin Artist i merituar. Luftar Paja ka marrë pjesë dhe në shumë filma artistik. Ku ka spikatur me role në filma patriotik si "Këshilltarët", "Guna përmbi tela", "Nëntori i dytë", "Gjeneral Gramafoni". Filma me teme të asaj kohe si "Ëndrra për një karrige", "Zevendesi i grave" etj.

Ai ka luajtur përkrah aktoreve të mëdhenj shqiptar si Rolan Trebicka, Sandër Prosi, Mirush Kabashi, Hajrie Rondo, Kadri Roshi etj. Në vitin 1990 merr titullin e lartë Artist i popullit. Në vitin 2001 është shpallur qytetar nderi i Fierit. Në 31 maj të vitit 2005 atij i jepet titulli Nder i Qarkut Fier.

Filmografia

  • Pas një lajmi 2001
  • 8 persona plus , teatër-komedi
  • Zëvendësi i grave 1987
  • Gurët e shtëpisë sime 1985
  • Ëndërr për një karrige 1984
  • Këshilltarët 1979
  • Udha e shkronjave 1978, Hanxhiu
  • Pranverë në Gjirokastër 1978, Babi i dhëndërit
  • Gjeneral gramafoni 1978
  • Gunat mbi tela 1977, Velo
  • Streha e re 1977

 

 

Ekrem Ajruli - Biografi

Ekrem AjruliNjë herë u linda, më tepër nuk besoj se ka nevojë. Kjo ardhje në këtë botë të fëlliqur pitigonësh, ganecash, kapucarësh, laurash, ndodhi aksidentalisht, jo nga dëshira ime, por nga epshi i të tjerëve. Unë nuk bëra ftesë as kërkesë që të vij në këtë mes ku të zë frymën handraku dykëmbësh që nuk ka pikë sedre. Nëse pyetni se kush jam, mos u lodhni kot, jam një kopje e zhubravitur e maskave të shumta të cilat kanë ardhur në këtë botë vetëm për të harxhuar ajrin, ujin dhe bukën, të cilat Zoti i bekoi për gjallesat më të pështira dhe mosmirënjohëse në tokë. Më thanë se paskam qarë shumë kur jam lindur, vaj im i paska gëzuar pamasë ata, unë qaj ata qesh.

- Çfarë ironie, ti qan ata qeshin, ti trishtohesh ata gëzohen.

- Nuk e dinin se vaji im ishte protestë pse erdha në këtë mjedis. Pas ca ditësh morën vendim të më vënë edhe etiketën të cilën do ta mbaj deri në ditën e lirisë, pra më emëruan me një emër të cilit edhe sot e kësaj dite nuk ia di kuptimin as domethënien, nëse ky epitet ka kuptim negativ është në rregull, ngase unë jam i njëjtë me kufomat e gjalla të cilat më rrethojnë në çdo cep. Por nëse emri ka domethënie pozitive, ndërsa unë nuk jam gjë tjetër vetëm një bërllok si shumë karakatina tjera, kjo më trondit.

Shtetet e fuqishme gjithmonë sillen si gangsterë, ndërsa shtetet e dobët si prostituta.

Hajnat u pasuruan brenda natës- prandaj është vështirë të njihen gjatë ditës.

Bota e krijuesve poetëve ngjan me universin, ka shumë yje, disa duken më pak disa më shumë, por secili ka drejtimin dhe dritën e vet./E.Ajruli

Kjo Biografi është e shkruar në librin e fundit "Oaza e rriqërave"

 

Bora Arllati - Biografi

Bora Arllati

Bora Arllati lindi në 18 janar 1996 në qytetin e Gjakovës. Si fëmija i parë në familjen e saj, ajo është bijë e një babai gjakovar dhe një nëne nga Elbasani/Shqipëria.

Bora hobi të saj ka muzikën dhe vallëzimin, por talentin e vërtetë e ka shfaqur në letërsi me krijime të mrekullueshme në formën e esesë dhe poezisë. Që në klasë të parë, ajo botoi në revistën "Marigona" të shkollës "Zekeria Rexha" krijimin e parë me titull: "Unë Bora dhe bora e dimrit".

Aktivitetin fillestar e ka nisur në organizimet pegasiane të letrarëve shqiptarë ndërsa në Konkursin letrar "Dita Poetike Durrsake 2014" u nderua me Mirënjohje.

Libri "Përtej" është botimi i saj i parë të cilin autorja e re e nxjerr në ditët e fundit si maturante e gjimnazit "Hajdar Dushi". Ky libër u promovua në kuadër të 50 vjetorit Jubilar të Mitingut të Poezisë në Gjakovë.

 

Shpend Ahmeti - Biografi

Shpend Ahmeti ka lindur më 18 prill 1978 në Prishtinë.

Shpend AhmetiKa përfunduar studimet master në Politika Publike në Universitetin e Harvardit, SH.B.A, gjatë viteve 2002 - 2004, duke specializuar në Zhvillimin Politik dhe Ekonomik. Studimet universitare i ka përfunduar në Ekonomi dhe Administrim Biznesi në Universitetin Amerikan në Bullgari, gjatë viteve 1996 - 2000, duke specializuar në Ekonomi të Aplikuar dhe Administrim Biznesi.

Gjatë kohës së studimeve 1999-2002, Shpendi ishte senator dhe më pas Kryetar i Qeverisë Studentore në Universitetin Amerikan të Bullgarisë , si dhe udhëheqës i komuniteteve të ndryshme (nga më shumë se dhjetë vende) përgjatë një periudhe të reformave në universitet. Në universitetet amerikane, angazhimi në Qeveri studentore është eksperienca që ndërthur dijen, organizimin, përballjen për mbrojtjen e të drejtave dhe përgjegjësinë e besimin nga shokët dhe kolegët.

Prej vitit 2005 Shpendi është ligjërues i Politikave Publike dhe Politikave Ekonomike Ndërkombëtare në Universitetin Amerikan këtu në Kosovë (AUK).

Ndërsa prej vitit 2011 është nënkryetar i Lëvizjes VETËVENDOSJE!, i zgjedhur nga Këshilli i Përgjithshëm.

Përveç gjuhës amtare shqipe, Shpendi flet atë angleze, serbo-kroate, maqedone, bullgare dhe ka njohuri të gjuhës gjermane.

Është fitues i disa çmimeve e shpërblimeve si World Bank Spot Award dhe i atij në European Debating Championships.

Shpendi jeton në Prishtinë me bashkëshorten, Ardianën, dhe dy fëmijët, Tean dhe Anrin.

Shpend Ahmeti u zgjodh Kryetar i Komunës së Prishtinës pas balotazhit, më 1 dhjetor në zgjedhjet lokale të vitit 2013 në Kosovë.

Autor të ndryshëm