Prizren, sot protestohet kundër ligjit për QHP

Lajme

Sunday, 29 January 2012 12:06

0 Comments

Dhjetëra parti politike, bashkësi fetare, organizata të ndryshme, kanë dalë në mbështetje të protestës së nesërme në Prizren, të organizuar nga koalicioni ad-hoc OJQ-ve në Mbrojtje të Qendrës Historike të Prizrenit.

Ky koalicion ka prezantuar të shtunën detajet e protestës qytetare për të kundërshtuar projekt-ligjin për Qendrën Historike të Prizrenit. Sipas organizatorëve, protesta fillon në orën 13:00, ndërsa pikë tubimi do të jetë Sheshi Shadërvan në Prizren.

Organizatorët po ashtu kanë thënë se kundërshtojnë tendencat e subjekteve të ndryshme politike për të përfituar dhe për t’i dhënë protestës dimension politik.

Ndërkaq, Lëvizja Vetëvendosje, të shtunën, gjatë një konference për medie, ka sqaruar se nuk është organizatore e kësaj proteste, mirëpo e përkrah atë. Edhe parti tjera politike opozitare kanë dalë në përkrahje të protestës.

E koalicioni i OJQ-ve të Prizrenit i ka ftuar të gjithë qytetarët e Prizrenit, pa marrë parasysh orientimet e tyre politike, fetare ose etnike, që të dielën të jenë të bashkuar në protestën qytetare për të kundërshtuar një ligj që do t’i dëmtojë interesat e të gjithë atyre që jetojnë në Prizrenit. /Zëri/

Teilen